افغانستان کے ہندوکش خطے میں زلزلہ، شدت 6.3، 7 افراد جاں بحق، 150 زخمی

[ad_1]

افغانستان کے ہندوکش خطے میں شدید زلزلے کے جھٹکے محسوس کیے گئے۔ خبر ایجنسیوں کے مطابق زلزلے کے جھٹکے مزار شریف سمیت متعدد شہروں میں محسوس کیے گئے۔ مختلف حادثات کے نتیجے میں 7 افراد ہلاک اور 150 سے زائد زخمی ہوئے، جبکہ متعدد مکانات اور عمارتوں کو شدید نقصان پہنچا۔ حکام نے ہلاکتوں میں اضافے کا خدشہ ظاہر کیا ہے۔

عینی شاہدین کے مطابق زلزلے کے وقت شہری گھبراہٹ میں گھروں سے باہر نکل آئے۔

فرانسیسی خبر رساں ادارے نے بتایا کہ لوگ آدھی رات کو اپنے گھروں سے نکل کر کھلے مقامات کی طرف دوڑنے لگے کیونکہ انہیں خدشہ تھا کہ عمارتیں گر سکتی ہیں۔

امریکی جیولوجیکل سروے کے مطابق زلزلے کی شدت 6.3 اور گہرائی 28 کلومیٹر ریکارڈ کی گئی۔ زلزلے کا مرکز صوبہ سمنگان کے ضلع خُلم سے تقریباً 22 کلومیٹر جنوب مغرب میں تھا۔

رپورٹس کے مطابق زلزلے کے جھٹکے ترکمانستان، تاجکستان، ازبکستان اور ایران میں بھی محسوس کیے گئے۔

واضح رہے کہ رواں سال 31 اگست کو افغانستان میں 6.0 شدت کے زلزلے میں دو ہزار سے زائد افراد ہلاک ہوئے تھے، جبکہ 2023 میں آنے والے 6.3 شدت کے زلزلے اور آفٹر شاکس کے نتیجے میں کم از کم چار ہزار اموات ہوئیں۔