اسرائیل کے شہر تل ابیب میں فوجی اڈے کے قریب بس اسٹاپ پر کھڑے افراد پر ایک ڈرائیور نے ٹرک چڑھا دیا، واقعے میں کم ازکم 33 افراد زخمی ہوگئے جن میں سے 6 کی حالت تشویشناک ہے۔
غیر ملکی خبررساں ادارے کے مطابق واقعہ گیلات فوجی اڈے کے قریب پیش آیا ہے جس میں اسرائیلی خفیہ تنظیم ’موساد‘ کا ہیڈکوارٹر بھی واقع ہے۔
اسرائیلی ایمرجنسی سروس اور پولیس کا کہنا ہے کہ اتوار کو شمال تل ابیب کے تجارتی مرکز میں واقع بس اسٹاپ پر کھڑے افراد پر ایک ڈرائیور نے ٹرک چڑھادیا۔
خبررساں ادارے کے مطابق اسرائیلی ایمرجنسی سروسز کا کہنا ہےکہ اسرائیلی پولیس اس واقعے کو حملے کے طور پر دیکھ رہی ہے۔
اسرائیلی طبی سروس نے ایک بیان میں کہا ہے کہ طبی عملے نے درجنوں افراد کو طبی امداد فراہم کی ہے، خبررساں ادارے کے مطابق واقعے میں 6 افراد شدید زخمی ہوگئے جبکہ 7 کو درمیانی درجے اور 20 کو معمولی چوٹیں آئی ہیں۔
واضح رہے کہ واقعہ ایسے وقت پیش آیا ہے جب عبرانی کیلنڈر کے مطابق گزشتہ سال 7 اکتوبر کو حماس کے اسرائیل پر کیے گئے حملے کی پہلی برسی منائی جارہی تھی۔
