بالی ووڈ اداکار نوازالدین صدیقی ایک حالیہ آن لائن گیمنگ اشتہار کی وجہ سے تنازع کا شکار ہو گئے ہیں۔
بھارتی میڈیا کے مطابق انتہاپسند تنظیم ہندو جن جاگرتی سمیتی نے الزام عائد کیا ہے کہ نوازالدین نے ایک اشتہار میں پولیس افسر کا کردار ادا کرتے ہوئے عوام کو پوکر کھیلنے کی ترغیب دی، جس سے مہاراشٹر پولیس کی ساکھ کو نقصان پہنچا ہے۔
تنظیم نے ممبئی پولیس کمشنر اور ڈائریکٹر جنرل پولیس مہاراشٹر کو ایک خط لکھا ہے جس میں نوازالدین صدیقی اور بگ کیش پوکر کے مالک انکور سنگھ کے خلاف قانونی کارروائی کا مطالبہ کیا گیا ہے۔
خط میں کہا گیا ہے کہ یہ اشتہار قانون نافذ کرنے والے اداروں کے لیے تضحیک اور بےعزتی پر مبنی ہے۔
اس تنازع پر نوازالدین صدیقی کی جانب سے تاحال کوئی بیان سامنے نہیں آیا ہے۔
