اسلام آباد:
اے این ایف کے مختلف آپریشنز میں 12 کروڑ روپے سے زائد کی منشیات پکڑی گئی۔
ترجمان اینٹی نارکوٹکس فورس کے مطابق تعلیمی اداروں سمیت ملک کے مختلف شہروں میں منشیات فروشی اور اسمگلنگ کے خلاف کارروائیوں کا سلسلہ جاری ہے، اس دوران 10 مختلف آپریشنز میں 12 کروڑ روپے سے زائد مالیت کی 396.125 کلوگرام منشیات برآمد کرکے 7 ملزمان کو گرفتار کرلیا گیا ہے۔
تعلیمی اداروں میں کارروائیوں کے دوران ایم ون اسلام آباد پر ملزم سے 460 گرام آئس برآمد ہوئی۔ دوسری جانب ٹنڈو جام حیدرآباد میں ملزم سے 5 کلو چرس برآمد کرلی گئی۔ اسی طرح منیر احمد روڈ کوئٹہ پر یونیورسٹی کے قریب سے 2 ملزمان سے 8 کلو چرس اور 160 گرام ویڈ برآمد ہوئی۔
دوسری جانب کوئٹہ میں ایک اور یونیورسٹی کے قریب ملزم سے ایک کلو 625 گرام آئس اور 400 نشہ آور گولیاں برآمد کرلی گئیں۔ گرفتار ملزم نے تعلیمی اداروں کے طلبہ کو منشیات فروخت کرنے کا اعتراف بھی کرلیا ہے۔
اے این ایف کی دیگر کارروائیوں میں انڈس چوک کراچی کے قریب گاڑی سے 280 کلو چرس برآمد ہوئی۔ بلوچستان کے 2 مختلف علاقوں میں کارروائیوں کے دوران 57 کلو ہیروئن اور 39 کلو چرس برآمد کی گئی۔
لکپاس ٹول پلازہ مستونگ کے قریب ملزم سے ایک کلو 500 گرام ہیروئن اور 2 کلو آئس برآمد کی گئی۔ جی ٹی روڈ اٹک کے قریب ملزم سے 600 گرام چرس برآمد ہوئی۔ حب ریور روڈ سے 500 گرام آئس برآمد ہوئی۔
تمام کارروائیوں میں گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔
