کراچی: کرکٹر فخر زمان نے سابق کپتان بابر اعظم کو ٹیم سے ڈراپ کرنے پر تنقید کی وجہ سے ملنے والے پی سی بی کے شوکاز نوٹس کا جواب دے دیا۔
ذرائع کے مطابق پاکستان کرکٹ بورڈ (پی سی بی) کی جانب سے فخر زمان کا جواب دیکھنے کے بعد ان کی دورہ آسٹریلیا کے لیے ٹیم میں شمولیت سے متعلق فیصلہ کیا جائے گا۔
دوسری جانب دورہ آسٹریلیا کے لیے قومی ٹیم کا اعلان کل بروز پیر کیے جانے کا امکان ہے۔
واضح رہے کہ انگلینڈ کے خلاف دوسرے ٹیسٹ سے بابراعظم کو ڈراپ کرنے پر فخر زمان نے سوشل میڈیا ویب سائٹ ’ایکس‘ پر جاری بیان میں کہا تھا کہ بابر اعظم کو ڈراپ کرنا باعث تشویش ہے جس سے منفی پیغام جائے گا۔
یہ بھی پڑھیں: نیوزی لینڈ ویمنز ٹیم نے پہلی بار ٹی 20ورلڈ کپ جیت لیا
فخر زمان کا کہنا تھا کہ بھارت نے ویرات کوہلی کو 2020 سے 2023 تک 3 سال خراب فارم کے باوجود ڈراپ نہیں کیا۔
ان کا کہنا تھا کہ گھبراہٹ میں فیصلے کرنے کے بجائے اپنے کھلاڑیوں کا تحفظ کریں۔
واضح رہے کہ پی سی بی نے انگلینڈ کے خلاف آئندہ 2 ٹیسٹ میچز کے لیے بابر اعظم، سرفراز احمد، شاہین اور نسیم شاہ کو ٹیم سے ڈراپ کرنے کا فیصلہ کیا تھا۔
