اسلام آباد:
وزیر داخلہ محسن نقوی کی بطور چیئرمین پی سی بی تعیناتی کو اسلام آباد ہائی کورٹ میں ایک بار پھر چیلنج کردیا گیا۔
ایکسپریس نیوز کے مطابق چیئرمین پی سی بی محسن نقوی کی تعیناتی کے خلاف درخواست شہری احمد نواز کی جانب سے دائر کی گئی۔
اسلام آباد ہائیکورٹ نے چیئرمین پی سی بی کی تعیناتی کیخلاف درخواست کو کل سماعت کے لیے مقرر کرلیا جس پر سماعت چیف جسٹس عامر فاروق کل درخواست پر سماعت کریں گے۔
درخواست گزار نے مؤقف اختیار کیا کہ چیئرمین پی سی بی کی تعیناتی آئی سی سی رولز کی خلاف ورزی یے۔ درخواست میں وفاقی حکومت ، وزیر اعظم کو بطور پیٹرن ان چیف، چیئرمین پی سی بی، وزارت داخلہ اور دیگر کو فریق بنایا گیا ہے۔
واضح رہے کہ اس سے قبل شہری محمد میسم کی درخواست پر چیف جسٹس عامر فاروق نے 5 مارچ کو نوٹس جاری کیا تھا تاہم 5 مارچ کے بعد محمد میسم نامی شہری کی درخواست مقرر نہیں ہوسکی۔
