پاکستان نے شنگھائی تعاون تنظیم (ایس سی او) ممبر ممالک میں مشترکہ کرنسی کے استعمال کی تجویز دے دی۔
ایس سی او سربراہی اجلاس سے افتتاحی خطاب کے دوران وزیراعظم شہباز شریف نے کہا کہ مشترکہ کرنسی کی جانب بڑھنے اور بینکنگ چیلنجز کیلئے ایس سی او انٹربینک یونین ہونی چاہیے۔ متبادل ڈویلپمنٹ فنڈنگ مکینزم بنانے کی حمایت کرتے ہیں ۔ خطے میں ترقی کیلئے ایس سی او کے کردار کو مزید مضبوط کرنا ہوگا۔
وزیراعظم شہباز شریف کا کہنا تھا کہ ایس سی او ممبر ممالک میں مشترکہ کرنسی کے استعمال پر اتفاق بڑھنا اہم پیشرفت ہے، ہم فورم میں جدت کیلئے جاری اصلاحات کی تائید کرتے ہیں، تاکہ تنظیم اپنے وسائل کو مزید بڑھاسکے۔ ایس سی او سیکرٹریٹ میں انسداد دہشتگردی اسٹرکچر بنانے کی تائید کرتے ہیں۔
وزیراعظم شہباز شریف نے کہا کہ تمام ممالک کے درمیان تعاون کو مزید بڑھانا ہے ۔ اس سے ایس سی او خطے میں خوشحالی آئے گی ۔ باہمی تعاون بڑھانے سے امن اور استحکام آئے گا ۔ ہم نے مل کر عوام کا معیار زندگی بہتر بنانا ہے۔ ممبر ممالک اپنے تجربات شیئر کرکے مضبوط ایکشن پلان بنائیں۔
