وزن کم رکھنے کا انوکھا طریقہ دریافت

ایک تحقیق میں معلوم ہوا ہے کہ کھانے کے وقت کلاسیکل موسیقی سننے والے کم چکنی غذاؤں کا انتخاب کرتے ہیں اور کم کیلوریز کھاتے ہیں۔

یونیورسٹی کالج لندن سمیت مختلف ماہرین کی ایک ٹیم نے مطالعے میں بتایا کہ کھاتے وقت کلاسیکل موسیقی سن کر وزن کو کم رکھنے میں مدد دی جا سکتی ہے۔

تاہم، جیز، ریپ اور راک میوزک سے اجتناب ایک عقلمندانہ قدم ہو سکتا ہے کیوں کے مطالعے کے دوران جن افراد نے ان اقسام کی موسیقی سنی، انہوں نے غیر صحت بخش اور کثیر کیلوریز رکھنے والے جنک فوڈ کا انتخاب کیا تھا۔

جرنل برین ٹوپو گرافی میں شائع ہونے والی تحقیق نے ماضی کی ایک تحقیق کی تصدیق کی کہ پُرسکون موسیقی انسان کی بھوک کو کم کرتی ہے، جبکہ تیز موسیقی بھوک میں اضافہ کرتی ہے۔

محققین کا خیال ہے ہلکے ٹیمپو اور پُرسکون کلاسیکل موسیقی دماغ کے اس حصے میں فعالیت کم کر دیتی ہے جو بھوک کی شدت پیدا کرتے ہیں۔

محققین کا کہنا تھا کہ کھانے اور موسیقی کے درمیان ایک ممکنہ تعلق ہے۔ کچھ مطالعوں میں یہ معلوم ہوا ہے کہ کم آواز کا میوزک اور بلند پچ پر بجنے والی موسیقی لوگوں کے صحت بخش غذاؤں کے امکانات کو بڑھا دیتی ہے۔