بلوچستان کے علاقے دکی میں کوئلے کی کانوں پر مسلح افراد کے حملے میں 20 کان کن جاں بحق اور 7 زخمی ہو گئے۔
پولیس کے مطابق رات گئے نامعلوم افراد نے دکی کے ڈسٹرکٹ چیئرمین حاجی خیر اللّٰہ کی کوئلہ کانوں پر راکٹ اور دستی بم سے حملہ کیا ، زخمی کان کنوں کو اسپتال منتقل کر دیا گیا۔
بلوچستان میں ایف سی کی پوسٹ پر دہشتگردوں کا حملہ، 2 دہشتگرد مارے گئے، حوالدار شہید
کان مالک حاجی خیر اللّٰہ نے بتایا کہ حملہ آوروں نے 10 کانوں کی مشینری بھی نذر آتش کر دی ، میڈیکل افسر دکی اسپتال ڈاکٹر جوہر سدوزئی کا کہنا ہے کہ جاں بحق کان کنوں کا تعلق قلعہ سیف اللّٰہ، پشین، ژوب اور مسلم باغ سے ہے۔
اس کے علاوہ تین کا تعلق افغانستان جبکہ لورالائی، کچلاک، موسی خیل سے تعلق رکھنے والے افراد بھی مرنے والوں میں شامل ہیں۔ واقعے کی اطلاع ملنے پر پولیس اور ایف سی نے موقع پر پہنچ کر سرچ آپریشن شروع کر دیا۔
