اسلام آباد: بانی پی ٹی آئی کی بہن نورین نیازی نے کہا ہے کہ بہنوں کی ضمانت پر عمران خان نے پوچھا کہ کیا کوئی ڈیل ہوئی ہے؟۔
ہائی کورٹ میں میڈیا کے نمائندوں سے گفتگو کرتے ہوئےبانی پی ٹی آئی کی بہن نوری نیازی نے کہا کہ عمران خان سابق وزیراعظم ہیں، انہیں جیل میں جو سہولیات ملنی چاہییں وہ نہیں مل رہیں۔
انہوں نے کہا کہ بانی پی ٹی آئی سے اخبار، ٹی وی، شیونگ کِٹ سمیت باقی سہولیات بھی لے لی گئی ہیں۔ بانی پی ٹی آئی کو لنگر کا کھانا دے رہے ہیں، کمرے میں بند کیا اور باہر نکلنے کی بھی اجازت نہیں دی۔
نورین نیازی نے کہا کہ میری بہنوں (علیمہ خان اور عظمیٰ خان) کی ضمانت ہوئی تو بانی پی ٹی آئی پوچھ رہے تھے کہ کیا کوئی ڈیل ہوئی ہے؟۔ انہیں سمجھ نہیں آ رہی تھی کیوں کہ آج تک کوئی وہاں سے نکلا ہی نہیں۔ ان کا دل کرتا ہے کہ بانی پی ٹی آئی کہیں کہ اب مجھ میں ہمت نہیں، اب میں ڈیل کرتا ہوں۔ ان کا شروع دن سے دل کرتا ہے کہ بانی پی ٹی آئی ڈیل کر لیں۔
