انٹرنیٹ صارفین کیلئے بڑی خوشخبری

پاکستان میں صارفین کے لئے انٹرنیٹ اسپیڈ کے حوالے سے بڑی خوشخبری آگئی، پاکستان کو افریقہ-1 سب میرین کیبل سے منسلک کر دیا گیا۔

پی ٹی سی ایل نے ڈیجیٹل اور ٹیلی کام نظام کی بہتری کیلئے پاکستان کو افریقہ-1 سب میرین کیبل سے منسلک کر دیا ہے۔

بڑی ڈیٹا ٹرانسمیشن کی صلاحیتوں کی حامل سب میرین کیبل افریقہ-1 کو کراچی میں پی ٹی سی ایل ایکسچینج سے منسلک کیا گیا ہے۔

پی ٹی سی ایل نے افریقہ-1 کیبل سسٹم کنسورشیم میں شمولیت کے لیے باضابطہ معاہدہ کیا ہے ، جس کے تحت عالمی ڈیجیٹل مراکز کے ساتھ پاکستان کے روابط اور قومی ٹیلی کمیونی کیشن ڈھانچے کو مستحکم کیا جا سکے گا۔

دس ہزار کلومیٹر طویل اس کیبل سسٹم میں جدید ترین ٹیکنالوجیز شامل ہیں، جدید کیبل پاکستان کو سعودی عرب، متحدہ عرب امارات، مصر، سوڈان، الجیریا، فرانس، کینیا، اور جبوتی سمیت اسٹریٹجک اہمیت کے حامل مقامات سے جوڑے گا۔

پی ٹی سی ایل گروپ نائب صدر سید محمد شعیب نے کہا ہے کہ افریقہ-1 کیبل سسٹم میں ہماری شرکت پاکستان کے ’ڈیجیٹل وژن 2030‘ کے عین مطابق ہے اور ڈیجیٹل تقسیم کا خاتمہ کر کے لوگوں کو بااختیار بنانے کے لیے پُرعزم ہیں تاکہ مختلف شعبوں میں جدت کو فروغ ملے اور ملکی معیشت مستحکم ہو سکے۔

افریقہ ون سب میرین کیبل سے کننکشن کے بعد پاکستان میں انٹرنیٹ اسپیڈمیں اضافہ کی توقع کی جا رہی ہے تاہم کیبل سسٹم 2026 کے اوائل میں فعال ہونے صارفین کو عالمی معیار کی انٹرنیٹ سہولیات دستیاب ہوں گی۔

پی ٹی سی ایل افریقہ ون سب میرین کیبل کیلئے انسٹھ ملین ڈالر میں سے پچھتر فیصد گزشتہ چار سال میں ادا کر چکا ہے، بقیہ رقم اس سال کے آخر تک ادا کی جائے گی۔