توشہ خانہ 2 کیس میں عدالت نے آئندہ سماعت پر بریت کی کی درخواستوں پر دلائل مکمل کرنے کی ہدایت دے دی۔
اڈیالہ جیل میں اسپیشل جج سینٹرل شاہ رخ ارجمند نے توشہ خانہ 2 کیس پر سماعت کی۔ بانی پاکستان تحریک انصاف( پی ٹی ائی) عمران خان کو کمرہ عدالت میں پیش کیا گیا۔ بشری بی بی کی حاضری سے استثنی کی درخواست دائر کی گئی جو عدالت نے منظور کرتے ہوئے آئندہ سماعت پر بشری بی بی کو حاضری یقینی بنانے کی ہدایت کی۔
وکلا صفائی نے بانی پی ٹی آئی اور بشری بی بی کی بریت کی درخواستوں پر دلائل دیے۔ پبلک پراسیکیوٹر کی جانب سے دلائل میں بانی پی ٹی آئی اور بشری بی بی کی بریت کی مخالفت کی گئی۔ پبلک پراسیکیوٹر نے موقف اختیار کیا کہ بریت کی درخواستیں فرد جرم عائد کرنے کی کارروائی کو تاخیر کا شکار کرنے کی کوشش ہیں۔ عدالت فرد جرم عائد کرنے کیلئے تین ، چار تاریخیں دے چکی مگر فرد جرم عائد نہیں ہونے دی جارہی۔ استدعا ہے کہ عدالت توشہ خانہ ٹو کیس میں بانی پی ٹی آئی اور بشری بی بی پر فرد جرم عائد کرے۔
عمران خان اور بشریٰ بی بی کے وکیل سلمان صفدر نے استدعا کی کہ بریت کے حق میں کچھ دستاویزات جمع کروانا چاہتے ہیں وقت دیا جائے۔ عدالت نے توشہ خانہ 2 کیس کی سماعت 8 نومبر تک ملتوی کردی۔
